طال الليل ده ونام الكل .. بس الديك ده سهر ولا نمش
هف جناحه رعشة قوية .. رفرف ياما بس مطرش
لم جناحه وكن مكانه .. ورفع وشه وصاح ومخفش !
-----------------------------------------
...وأخاف من إيه ؟
(ردو طيور الدنيا عليه) :
- خاف م الدبح
وأنسى إنه عبيد دبحوه ؟
قبل الصبح ..
حتى ولاده هيبقو خانوه !
- خاف م الموت
وأحيا بكلمة مين لو راح ؟
أملك صوت ..
اللي خلقني .. خلقه صياح
- وإفرض صحت ؟
- مش هيغير صوتك شيء
- وإفرض نُحت ؟
- مش هتبل دموعك ريق ..
ريق عطشان
ده إحنا طيور عارفينه ده مين
مش إنسان
ده الينابيع والسيل والعين
- وإفرض صحت ؟
- مش هيغير صوتك ويل
- وإفرض بُحت ؟
- مش راح تفضح ظلم الليل
ليل الشر
لما الناس هتفت : يتهان
جلدو الحر
وتركو العبد يكونله مكان
- وإفرض صحت ؟
- حسّك واطي .. في وسط إلوف
- وإفرض صحت ؟
- حسك بيه مش يلغي الخوف
خوف تلميذ
بعد ما شاف سلطان العرش
والتحفيظ
والتنبيه انه مينكرش
ينكر لييييييه ؟؟
لازم أصيح وهصيح مسكتش
هبكي عليه
حتى إن كنت هموت . مقدرش
أنا لو أطير
كنت هربت معاكو وأخون
بس أنا غير
كل طيور السما والكون
أنا مخنوق
بين جناحاتي حياتي عليه
أنا لو فوق
كنت أخطفه وأحضنه وأحميه
أنا مش نسر
كنت أخدته جزيرة في نار
وبنيت جسر
ممنوع يمشو عليه الأشرار
أنا مش ديب
كنا عوينا لو أنتو ديابة
وكنا نجيب
كل وحوش وأسود الغابة
ونخوفهم
اللي ما عرفو أزاي يصونوه
ونعرفهم
مين صلبوه وباعوه وخانوه
لكن أنا ديك !
بعرف بس أنفُض وأصيح
وهصيح ليك
ده اللي خلقني بيبكي جريح
أصيح كتير
ولو في صوتي التهلكة
هصيح وأغير
من مريمات عرفو البكا
هصيح أوي
عشان يبان أني معاك
وصياح قوي
يوجع ودان الناس هناك
هصيح غضب
وأنفُض جريمة للبشر
هصيح تعب
ويتبّح صوتي ويتحشر
هصيح هنا
وأبدأ أعد عشان تموت
وهعيش أنا
حر وبنادي بأعلى صوت
وأستنى يوم
ترجع ملك وأفضل أصيح
تغلب تقوم
تملى الفلك .. قام المسيح
............................................مينا الطيب jesus love